28.07.2014

Համացանց ու բջջային կապ` «Կովկասյան կենսաբազմազանության ապաստարան»-ում


Վայրի բնության և մշակութային արժեքների պահպանման հիմնադրամի մշտական գործընկեր ՎիվաՍել-ՄՏՍ-ի շնորհիվ «Կովկասյան կենսաբազմազանության ապաստարան»-ում տեղադրվել է հոսանքափոխարկիչ ենթակայան: Հիմնական կայանը գտնվում է ծովի մակարդակից 1300 մ բարձրություն ունեցող լեռան վրա: Բարձր լեռնային գոտիներում առավել դժվար է կառուցման աշխատանքներ անցկացնելը, անգամ ամենագնաց մեքենաները դժվարությամբ են հաղթահարում լեռնային ճանապարհը:

Նորակառույց կայանը Վայրի բնության և մշակութային արժեքների պահպանման հիմնադրամի (FPWC) «Կովկասյան կենսաբազմազանության ապաստարան»-ում անխափան բջջային կապ կապահովի: 

Բարձր լեռնային գոտում բջջային կապի հնարավորությունից բացի՝ կայանը թույլ կտա իրական ժամանակում անհրաժեշտ տվյալներ փոխանցել Ուրցաձորի էկոկրթական կենտրոն՝ SIM-քարտի հնարավորություն ունեցող թվային տեսախցիկների միջոցով, որոնք տրամադրել էր ՎիվաՍել-ՄՏՍ-ը: Օրինակ՝ տեսախցիկը կարող է գրանցել վայրի կենդանու առկայությունը և փոխանցել տվյալը համապատասխան հասցեով: 

Գերարագ ինտերնետի շնորհիվ Ուրցաձորի էկոկրթական կենտրոնի այցելուները հնարավորություն կունենան անխափան հաղորդակցվելու արտաքին աշխարհի հետ, այդ թվում՝ ուղարկելու և ստանալու մեծածավալ փաստաթղթեր, կառավարելու վեբ-կայքեր, հետևելու եղանակի տեսությանը և այլն: 

«Կովկասյան կենսաբազմազանության ապաստարան»-ը գտնվում է ժայռերով շրջապատված մեկուսի վայրում: Ձմռանը, առատ ձյան ժամանակ, ճանապարհները կարող են անանցանելի դառնալ: Հետևաբար՝ շարժական հաղորդակցության հասանելիությունը առաջնային անհրաժեշտություն է: 

Բացի այդ, ՎիվաՍել-ՄՏՍ-ի օգնությամբ՝ հոսանքափոխարկիչ ենթակայանից առանձին հոսանքագիծ կանցկացվի կենտրոն՝ պոմպակայանի միջոցով գետից ջուր հանելու և հաճախակի ոռոգման կարիք ունեցող ավելի քան 2000 նորատունկ ծառերը ջրելու համար:

Ձայնային և տվյալների փոխանցման շարժական ծառայությունների հասանելիությունը նաև կնպաստի Արարատի մարզի գյուղական բնակավայերում էկոտուրիզմի զարգացմանը:

Վայրի բնության և մշակութային  արժեքների պահպանման հիմնադրամն իր խորին շնորհակալությունն է հայտնում ՎիվաՍել-ՄՏՍ-ի թիմին` ի դեմս գլխավոր տնօրեն Ռալֆ Յիրիկյանի` Կովկասյան կենսաբազմազանության ապաստարանում համացանցի և բջջային  կապի միջոցով շուրջօրյա հասանելիություն ապահովելու համար: